“رقة قلوب “

 

وأنا بالسوق شفت  ست قاعدة ع الأرض ..

.حاطه قدامها قفص و عليه بطتين بلدي…

و كانوا كبار شوية
انا مش بحب البط الكبير…

فقلت لها عاوز بط أصغر شوية من فضلك ….

قالتلي مفيش غير دول قلت لها خسارة يمكن لو كنت جيت بدري شويه كنت لقيت حاجة تاني …

راحت مدارية وشها و معيطة ….

ليه يا حاجه بتعيطي و الله ما أقصد حاجة وحشة …. قالت اصل لو كنت جيتي الصبح بدري كنت برضه هتلاقيهم دول هما هما.
أنا قاعدة كدة من بعد الفجر و انا مش بياعة ….

دول كنت مربياهم بقالي 5 شهور علشان اوكلهم للعيال…

و لما راحوا المدرسة بهدومهم؛ و شنطهم القديمة اتكسفوا من صحابهم ورجعوا مكسورين الخاطر ودبلانين..

صحيتهم الفجر و سألتهم :
اجيبلكم لبس وشنط و لا تاكلوا البط؟
قالولي اللبس والشنط…
فطلعت ع السطح جبت البطتين…

و استأذنت صاحب المحل ده اقعد قدامه ابيعهم

واروح

و كل اللي يعدي يخسف بيهم الأرض؛  و خايفة يموتوا من الحر …. و لا العيال تأكل و لا تتعلم. …

قلت لها عاوزه فيهم كام؟
قالتلي الواحدة ب 70 و الله دول تربية بيتي و بلدي و الواحدة ترمي يجي 2 كيلو لحم. …. بس بالله عليك ما تفاصل فيهم
قلت لها طيب انا مش بعرف ادبح ممكن تدبحيهم

وتنضفيهم و اديتها 200ج و هجيلك بعد شوية بس هجيب حاجة و اجيلك ….

فرحت جدا و قالتلي حاضر هدبحهم عند الفرارجي اللي ع الناصية و استناك بس متتأخرش عليا.
طلعت جري ع التوحيد والنور
اخدتلها شنطتين و شوية أدوات دراسية ؛

و اخدت فلوس زيادة و نزلت جري ..

برضو اشتريت شوية خضار و سمنة و زيت و رز  ورجعت لها لقيتها ماسكه كيس فيه البط و فرحانة قوي..

اديتها الحاجة و قلتلها روحي اطبخي البطتين للعيال قالت دول بتوعك …

قلتلها ما انا قتلك من الأول ؛ مش بحب البط الكبير
عيطت وقعدت تدعيلي…
بعدها خرج صاحب المحل اللي مراقب الموقف كله من أوله. …. قالها مش قولتلك ربك كريم
مشيت و هي في منتهي السعادة بعد ما اديتها رقمي
وقفت شويه أبصلها و هي بتبعد ….
صاحب المحل بصلي وقالي عرضت عليها الصبح فلوس …. رفضت سيبتها تقعد و كل شوية أطل عليها و الله كان في نيتي اديها تمنهم بس عفتها منعتني  ولما شوفتك طولت معاها. ..دخلت صليت و دعيت أن ربنا يرقق قلبك عليها
و الحمد لله ….. استجاب
اللهم رقق قلوب خلقك علي خلقك
و لا تول علينا من لا يخافك و لا يرحمنا

 **مختارات الشارع العربي**